top of page

Urban pets x urbaner

Updated: Feb 17, 2023




გქონიათ შემთხვევა, როცა ქუჩაში ვინმე უცნობი დაგინახავთ და გაგჩენიათ

შეგრძნება, რომ ის სადღაც გინახავთ?! რა თქმა უნდა, გქონიათ. ჩვენს პატარა ქალაქში ეს არც ისე გასაკვირია. ყოველდღიურად უამრავ უბანულ ისტორიაში ვიხლართებით. ზოგჯერ ჩვენივე ნებით, ზოგჯერ შემთხვევით. ზოგჯერ ეს ისტორიები რაღაცას გვიტოვებს, გვზრდის, ზოგჯერ - არაფრის მომცემი აღმოჩნდება ხოლმე და ვივიწყებთ, ჩვენთვითონვე ვტოვებთ.


ამ და კიდევ ბევრი სხვა უთავბოლო ფიქრით შთაგონებული მივსეირნობდი დოლიძის ქუჩაზე, როცა ძალიან პატარა შავმა ფისომ წინ გადამირბინა, წამიერად შეჩერდა, დამაკვირდა (ყოველშემთხვევაში მე ასე მომეჩვენა) და გზა ძალიან საყვარელი და სასაცილო სირბილის მანერით განაგრძო. ეს ფისო სადღაც მინახავს! არა, ზოგადად პატარა შავი ფისო კი არა, კონკრეტულად აი ეს ფისო მინახავს მეთქი სადღაც! იქნებ წინა ცხოვრებაში?! ან იქნებ სიზმარში?! მერე გამახსენდა, სადღაც წავიკითხე, რომ თუ კი ოდესმე ვინმე დაგვსიზმრებია, ის უეჭველად სადღაც გვინახავს, რადგან ადამიანის წარმოსახვას არ შეუძლია სიზმარში სრულიად ახალი, უცხო სახის შექმნა.


გამოდის, ამ ფისოს პატარა, საყვარელი სახე არც სიზმრიდან ყოფილა ნაცნობი. მოკლედ, გონება მაქსიმალურად დავძაბე, ტვინში search-ის ფუნქცია გავააქტიურე და გამახსენდა! ეს 'Urban pets'-ის ფისოა! სწორედ ასე გადავწყვიტე გამეცნო 'Urban pets'-ის ვიდეოების ავტორი და მისთვის ეს ისტორია გამეზიარებინა. ახლა კი თქვენ მინდა გაგიზიაროთ დათო ვაშაკიძის ისტორია - ბიჭის, რომელსაც ცხოველები ძალიან უყვარს.



ურბანერი: მომიყევი შენს შესახებ.

დათო: მე ვარ დავით ვაშაკიძე. პროფესიით მონტაჟის რეჟისორი, ცოტა ოპერატორობაც შემიძლია და ცოტა ფოტოგრაფობაც. 18 წლიდან სხვადასხვა ტელევიზიაში ვმუშაობ. ბოლო წლების განმავლობაში, შევიძინე ყველა საჭირო ტექნიკა და გავხსენი სტუდია 'Tbilisi record studio'. მოკლედ, კამერა ჩემი განუყოფელი ნაწილი გახდა. ჩემს ობიექტივში ხშირად ხვდებიან ჩვენი უსახლკარო ოთხფეხა მეგობრები და ეს ძირითადად მაშინ ხდება, როცა მე და რეი (ჩემი ცუგა) ვსეირნობთ. ნელნელა ეს სეირნობები იმ ვიდეოების სერიად იქცა, რომელიც ჩვენი და მიუსაფარი ცხოველების ურთიერთობის სხვადასხვა ეპიზოდს ასახავს.


ურბანერი: სანამ უშუალოდ შენს წამოწყებაზე ვისაუბრებთ და პროექტის შინაარსს განვმარტავთ, შენი და ცხოველების მეგობრობაზე მომიყევი.

დათო: ზოგადად შინაური ცხოველები ძალიან მიყვარს და ყოველთვის ვცდილობდი შეძლებისდაგვარად მათზე მეზრუნა; თუმცა მას შემდეგ, რაც ჩემს ცხოვრებაში რეი გაჩნდა, თითქოს ყველა სხვა ცხოველთანაც კიდევ უფრო დავახლოვდი. უკვე 8 წელია რეი ჩვენი ოჯახის წევრი და ჩემი საუკეთესო მეგობარია! სეირნობისას რეიმაც მალევე გაიჩინა მეგობრები, ისინიც თავისმხრივ ჩემი მეგობრები გახდნენ. ასე რომ, ყოველ გასეირნებაზე ორი საქმის ერთად კეთება მიწევდა - თან რეის ვასეირნებდი და თან მის ქუჩის მეგობრებს ვაპურებდი. რეის სამეგობრო წრე ნელნელა იმდენად გაიზარდა, რომ კატებიც კი შემოიერთა. ნუ, ვერ ვიტყვი, რომ რეის კატებთან დამეგობრება მარტივად მოვახერხე, მაგრამ მთავარია რომ ჩვენ ეს შევძელით. არვიცი კიდევ რა გითხრათ რეიზე. ბოქსიორს პატრონის ამორჩევა ცოდნია, რეიმ მე ამირჩია - სახლში მისვლას თუ ვაგვიანებ, ჩემი ოთახიდან თათს არ მოიცვლის, ყურებდაცქვეტილი ფანჯრიდან იყურება და მელოდება. მიუხედავად იმისა, რომ ცხოვრებაში არავისთვის უკბენია, ძაღლებთან მაინც ისე დგას - კაცურად. სხვათაშორის რეის შეყვარებულიც ჰყავს, მასტიფის ჯიშის ცუგა - სახელად მავნე. მე, რეი და მავნე ერთად ხშირად ვსეირნობთ ხოლმე და მინდა დარწმუნებით გითხრათ, რომ ერთმანეთთან ჭეშმარიტი სიყვარული აკავშირებთ. მავნე სახლიდან ხშირად იპარება და გვსტურმობს ხოლმე. ზოგადად ჯიშიანი ძაღლების შეძენის წინააღმდეგი ვარ, მაგრამ ეს შემთხვევა გამონაკლისია. მე და რეიმ ერთად ბევრი თავგადასავალი, ბედნიერებით, თუ სირთულეებით სავსე დღეები გამოვიარეთ - ისიც გაიზარდა და მეც.



ურბანერი: როგორ გაჩნდა 'Urban pets' YouTube channel-ის შექმნის იდეა და რას მოიაზრებს ის?

დათო: 'Urban pets'-ის იდეა სწორედ ჩემი და რეის სერნობისას გაჩნდა. ყოველდღიურად საკმაოდ დიდხანს ვსეირნობთ, ძირითადათ დოლიძის, ხილიანის და ბახტრიონის ტერიტორიაზე. ქუჩებში, თუ ჩიხებში შემხვედრი შინაური ცხოველებისთვის საგზალი ყოველთვის თან გვქონდა; ნელ-ნელა უფრო მეტი მათგანის გამოკვება დავიწყეთ და საბოლოოდ ეს ერთგვარი რიტუალი, ჩვენი სეირნობის განუყოფელ ნაწილად იქცა. როგორც საუბრის დასაწყისში გითხარით, პროფესიიდან გამომდინარე გადაღება და მონტაჟი მეხერხება, ჰოდა ერთ დღესაც ჩემს მეგობართან კონსულტაცია გავიარე - გავანდე იდეა, რომ YouTube არხის გაკეთებას ვფიქრობდი. ხომ შეიძლებოდა, ათიდან ერთ ადამიანს მაინც მონდომებოდა ქუჩის ცხოველების დახმარება, ჩვენი ვიდეოების ყურების შემდეგ. მოკლედ, ვიფიქრე, რომ 'Urban pets' YouTube channel-ი საშუალებას მომცემდა მეტი ადამიანისთვის გამეზიარებინა ჩემი ხედვა და გულწრფელად მჯეროდა, რომ ასე მეტი ცხოველის დახმარებას შევძლებდი. ჩემს მეგობარს ძალიან მოეწონა იდეა. ჩემი ძმა, რომელიც ამჟამად ამერიკაში ცხოვრობს, YouTube არხის გაკეთებაში დამეხარა და ასე შეიქმნა channel-ი. უკვე 2 თვეა, რაც YouTube არხი 'Urban pets' გავუშვით, აქტიურად ვტვირთავთ ვიდეოებს და მაქსიმალურად ვცდილობთ ჩვენი სათქმელი სწორად მივიტანოთ მაყურებლამდე. ვფიქრობ, რომ ეს სივრცე ბევრ ცხოველის მოყვარულს გაგვაერთანებს და საბოლოოდ ერთად შევლძებთ მეტი ქუჩის ცხოველის დახმარებას.


ურბანერი: რატომ დაარქვი 'Urban pets'?

დათო: სახელს, რა თქმა უნდა, ძალიან დიდი მნიშვნელობა აქვს. მას შემდეგ, რაც არხის გაკეთების იდეა გამიჩნდა, აქტიურად დავიწყე ფიქრი channel-ის სახელზეც. მიფიქრია მომხმარებლის პოზიციიდანაც; საკუთარ თავს ხშირად ვეკითხებოდი, როგორი სახელი მომეწონებოდა, როგორც მაყურებელს?! საბოლოოდ მივხვდი, რომ საუკეთესო ვარიანტი იქნებოდა, თუ სახელი პირდაპირ გადმოსცემდა არხის შინაარსს. სწორედ ასე დაიბადა 'Urban pets' - არხი, ურბანულ დასახლებებში მცხოვრებ იმ ოთხფეხა შინაურ ცხოველებზე, რომლებიც ჩვენს დახმარებას ითხოვენ. ზოგი დახმარებასაც კი არ ითხოვს, უბრალოდ ადამიანთან ურთიერთობა უნდა.



ურბანერი: 'Urban pets' არის channel-ი მათთვის ვისაც.....

დათო: ..........ვისაც შინაური ცხოველები უყვარს, ვისაც ზრუნვა და სიყვარული შეუძლია, ვისაც მათი დახმარების სურვილი აქვს. სამწუხაროდ, ჩვენს ქალაქში ძალიან ბევრი მიუსაფარი ცხოველია, რომელიც ქუჩაში არაფრის იმედად ცხოვრობს. მე ვცდილობ დავეხმარო იმ ფისოებს და ცუგებს, რომლებსაც ჩემს ყოველდღიურ ცხოვრებაში ვხვდები, შემდეგ კი ეს channel-ის მეშვეობით სხვებსაც გავუზიარო. ამ არხის შინაარსიც ხომ ესაა? იქნებ ზოგ ადამიანში გავაღვიძო მზრუნველობის სურვილი და პასუხისმგებლობის გრძნობა. გავუჩინო სურვილი, რომ იზრუნის ოთხფეხა ცოცხალ არსებებზე. მჯერა, რომ ყველამ თავის ქუჩაზე თუნდაც ერთ ფისოს, ან ცუგას რომ მოუაროს, ბევრად წინ წავალთ.


ურბანერი: რა სამომავლო გეგმები გაქვს 'Urban Pets'-ის პროექტის ფარგლებში?

დათო: 'Urban pets'-ის განვითარებას და მომავალს ბევრი მიმართულებით ვხედავ. პირველი და უმნიშვნელოვანესი მიზანი და გეგმა, რა თქმა უნდა, რაც შეიძლება მეტი ცხოველის დახმარებაა. ამასთან ერთად, სურვილი მაქვს მიუსაფარი ცხოველების თავშესაფარი გავხსნა და ვფიქრობ, რომ ჩემი საბოლოო მისია სწორედ ეს არის. ამ საკითხზე უკვე დიდი ხანია ვფიქრობ და ვმუშაობ. YouTube არხის საბოლოო მიზანიც ესაა და ყველაფერი, რასაც ვაკეთებ ამას ემსახურება. ამ ეტაპზე 2-3 ადამიანი ვართ ამ საქმით დაინტერესებული და გვაქვს უდიდესი სურვილი, რომ რაც შეიძლება მეტი ადამიანი ჩავრთოთ ამ ყველაფერში. დასაწყისისთვის კი, თუ თქვენც ჩვენსავით გიყვართ ცხოველები, გამოგვყევით YouTube არხზე 'Urban pets'.




323 views0 comments

Recent Posts

See All
bottom of page